بت حيدر آنه او بت الطهر*****عافوني اخوتي ابدرب اليسر
آنه العقيله*****دمعي أسيله
ابــــــدرب الــيـــــسر
***************
بت حيدر آنه المرتضى****وحسين اخوي اوعباس
بيهم مشيت ابعزتي ****مامونه مرفوعة راس
من أنذكر بين الخلـﮓ****تنحني الذكر اسمي الناس
اوركبني بالعز والفخر****ابمحملي راعي النوماس
ﮔـال أفدي دونـﭻ روح اوعمر****او راسي اعلى متني اشحده اليمر
اولن الكفلني****راسه اويه ضعني
ابــــــدرب الــيـــــسر
***************
شفت المر آنه ابكربله****والمايمر اعلى البال
أجساد اخوتي برض الفلا****امسلبه اتغطيها ارمال
وآنه وحيده اويه العده****اموصايه الم واحمي عيال
شدونه من عـﮕب السلب****واحد لواحد بحبال
اولن حادي ضعني شمر اوزجر****اولني اعلى هزله عـﮕب الخدر
اوسوط اعلى متني****اهنا يالعفتني
ابــــــدرب الــيـــــسر
***************
فرونه من كتر الكتر****من كوفه لقصور الشام
وآنه وحيده أمّحّنه****مابين أرامل وايتام
ظيم اللي شفته ابسفرتي****كل ساعه تنعد ابعام
تتفرج اعلينه الخلـﮓ****ﭽنّه ترك مو اسلام
ﮔمت أطحن الهم والهم صبر****لمّن وﮔفنه ابذاك القصر
وابن الدعيه ****يتشفى بيه
ابــــــدرب الــيـــــسر
***************
عـﮕب اللي شفنا بالقصر****ردينه من شام الشوم
ﮔلت أرد أمرن بخوتي****مظلومه واشكي المظلوم
هناك أرد اعاتب ﭽـافلي****مسبيه اويحلاله النوم
من ينظر امتوني زرﮒ****من ﮔبره يفزع وايـﮕوم
من يسمع أدري ايشـﮓ الـﮕبر****ادري المصابي ينتغر
لو خبريته****عالعاينيته
ابــــــدرب الــيـــــسر
***************
ردينه لديار الأهل****لن الأهل موبيها
مابيها بس لون الكدر****ثوب الحزن ﭽـاسيها
من أندب ايردلي الصدى****ونتـﭻ نفع مابيها
حسين اشبـﭽيتي مايرد****لاطلعته اتشوفيها
اولابالنياحه ايرد الـﮕمر****مدفون اخوﭺ ابراﮒ النهر
غافي اويه جرحه****اوراسه اعلى رمحه
ابــــــدرب الــيـــــسر
***************
عمري اللي مابيه اخوتي****ماريده شللي ابعمري
عجّل عليه باللحد****ماريد أظل يادهري
صح انته عشت امصيبتي****بس بيه أبد ماتدري
وديني ليهم يادهر****خل أستراح ابـﮕبري
اعلى امصاب اخوتي احشاي ابجمر****مايطفي ناري غير الـﮕبر
انسه ابسكنته****كل اللي شفته
ابــــــدرب الــيـــــسر
***************
عبد الرزاق الشيباني 