[mahdi_2000]

استقبال هلال شهر محرم الحرام والحزن فيه على الحسين

بالأحزان
نستقبلك كل عام
والعنوان
دمعتــنه والآلام
نعيش بحزنك كل يوم
شهر حسين المظلوم
***
سنين ودمعة الذكرى
ما تترك نواظــــرنه
عدنه بالحزن إحساس
يهيـّـج كل مشـاعرنه
تبقه يا شهر عاشــــور
نبض ثورة ضمايرنه
حسين وكربله واسمك
عناويـــن التـــّذكرنه
ما ننساك
صورة بوسط كل عين
وبملكَاك
يحصل صـــبرنه امنين
جرح احبابك ملجوم
شهر حسين المظلوم
***
انته بمهجة العاشـــــك َ
ضميره وثورته ودينه
واليعرف محــبة احسين
ميكَدر يترك حسينــــه
تصير أيامـــك أيامــــــه
تساير دم شرايينـــــــه
واحنه بكد سعير الشوكَ
واكثــــــر لوعتك بينه
يا عاشور
ما ظل صبر بالروح
الدنيه اتدور
توهبنه هم واجروح
من يدري بالمهموم
شهر حسين المظلوم
***
عهدنه نخطــــه بالدمعات
جيـــــل بجيل نتذكر
من اجدادنــــــــه الميراث
من ايامـــــك المصدر
نعيش احنه ونموت احنه
وتجي الأحفاد تتصدر
تحيي الجيتك كل عــــام
مجالس والشمــل يكبر
الأجيال
تحيي بحزن ذكراك
الآمــال
عشناهه احنه وياك
خله اليريد يلوم
شهر حسين المظلوم
***
يلومونه البعض يا حيف
المن نلطــــــــم ونحزن
ما يدرون بالعبـــــــرات
الهه بكل كَلــــب مسكن
ما يرون حب حسيـــــن
النه بكل عصــــر مأمن
ندميهه الصدور ومـــا
يهمنه الي يســـيء الظن
بينه الحيل
اجيـــــال تقود اجيال
انهار وليل
نبقه اعله هذا الحال
اعلينه المآسي تحوم
شهر حسين المظلوم
***
نريد بمطلع أيـــــامك
نعاهد بيهــه أبو اليمه
نكَله اوياك يا مظلوم
كلـــنه ارواح مهتمــه
فداء الشهرك نقـــدم
دمنه وشهرك الرحمه
وتدري بشاربك ظلت
يبو الأحـــرار هالأمه
كلنه أنصار
مهما كَصــــانه البين
عهد أحرار
ما ننسه شهر حسين
فوكَ الكَلب مرسوم
شهر حسين المظلوم