[نور الحسين]

مل مني القلم ومن القلم مليت
عمت عين قلمنه المانفع شعره

تعب حتى الشعر ويه العراقيين
وصار بحال اهلنه وبالعراق ادرة

رسمت حروف العراق برسم فنان
وجمعت اربيل والانبار والبصرة

وكلت لازم حروفي توحد الخوان
ما معقولة هيجي تصير فد مرة

ورديت ولكيت دموع عالوجنات
حروف اللي رسمتهه اليوم مطشرة

كردستان تحجي بزودهه وتكول
احنه العاصمه وبغداد متأخرة

والانبار شالت سيف عالخوان
لو ليه الحكم لو افلش الاسرة

والبصرة تكول احنه نريد اقليم
ومن نفط العراق الكم فقط عشرة

وشفت للفتنه والله العراقيين
دون حروف ياناس منجرة

مذبوحه المحبه وناس تكره ناس
سوية اللي يحب والقابض الجمرة

حتى الورد مايرضه بعد بالماي
من دمنه تريد الورده والشجرة

رقم جبنه قياسي بالقتل والموت
وصرنه اول شعب نص ناسه متهجرة

نهر دجله يــ ناس من الجثث غركان
خلي انمد ايدينه لدجله وانجرة

على جثثنه تدور هالفضـــــــائيات
باهو اللي يصور وياخذ الاجرة

معصوبه العيون مكتفه الايدين
وانواع الرصاص يصوب بصدرة

لا اهله اجوي وجفنوا بجفان
مجهوله الهويه ومن درة بأمرة

اذا امه الحنونة الصايمه برمضان
ما اكلت اكلها وبقت تنتظرة

تنتظره يرد وتريد تحجي وياه
اثاري العيد لازم ينكطع مهره

لان باعت ذهبها بشارع الصياغ
حتى تزوج ابنها المافرح عمره

مانامت بقت سهرانه كل الليل
ايا ليل العراق المابزغ فجره

وماجاها صبر وطلعت تدور عليه
مثل طلعه حمامه بعينها العبرة

وماشافت ابنها وجاها ملك الموت
تعرف شنهي يعني تموت بالحسرة؟

معناها الفرح صاير مثل رجال
شايل ورد بيده وخنجر بظهره

معناها عراقك كاتل ومكتول
سودة كلوبهم وعقول مفترة

وكل هذا ويكلي احنه العراقيين
سنه وشيعه عشنه الحلوة والمرة

لا والله كذب احنه العراقيين
سنه وشيعه مثل الضرة عالضرة

ملينه الجذب وليمته وليا دوب
واقع حال لازم نخظع لأمرة

نعم خوان احنه وياك اني بهاي
بس مو من بعد تفجير سامره

بعد تفجير سامرة العراقيين
مثل فلم رعب ودمايته الحمرة

مو فتنه صحيح الصايرة بغداد
سونامي الفتن بغداد منتشره

قتل مو عالهويه هواي متوهمين
صارت عالاسم كص راسه ويشمرة

واليكلي انت حيل تبالغ بهاي
جبت حجه ودليل وياي هالمرة

اتحده بكر واتحدى ابو الخطاب
فن واحد البيهم يوصل الثورة

واتحدى علي واتحده هم حسين
اذا فلوجه طبها ومنكسر ضهره

صفــــــــــــــر كل النتايج للعراقيين
بس بالفتنه جابو عشرة من عشرة

هذا يكول سني ناصبي اغتالوه
وهذا يكول شيعي رافضي كفره

ضلوا بهالسوالف ياخزي وياعار
واسرائيل علكت نارها الكبرة

يول وين الشرف كدامكم بغداد
شكو ثوبها واخذوها متأسرة

غتصبوها الكفر...ماتسمعوها تصيح
انه ام الشرف واليوم مو عذره

بعد والله ماينفعنه قيل وقال
لان كلشي انتهى وانكسرت الجرة

مرحوم العراق استشهد من سنين
يا وسفه صفت اشلائه متنـــــثرة

متنثرة بمزابل يمها كوم كلاب
اكلت من لحومه وما درت سره

صير وياي بس هالمرة اترجاك
عيب من العراق اليوم نتبرة

صعبه بمزبله جثة العراق تصير
خلي نشيله منها وندفنه بكبرة