[عدنان الحمامي]

بسمه تعالى

سلام عليكم

--

--

--

المستهل

-

يالهمك ابگبلك -- لوضيعت دربك

للرضا امشيله -- وشعندك احچيله

لوضيعت دربك

--

يالعندك اهموم اشكثر ومدوهن الفكره

ومأيس انته امن المرض للشفه تنتظره

للرضا اتعناله وأخذ رايه اله خضره

واعگدها يمه وحلفه ابفاطمه الزهره

امن العله تتشافه -- بالرضا والطافه

ابنذرك توفيله -- وشعندك احچيله

--

سلطان هوه بالكرم معروف وبعطفه

وهو طبيب الكل علل والوادم اتعرف

يالتشكي بعيونك رمد وتّدور الوصفه

الشباچه طوفه وجمرتك من الرمد تطفه

العينك يشافيها -- والماي لوبيها

من عينك ايشيله -- وشعندك احجيله

--

چم اعمه من يمه دخل ويرد نظر عينه

بالجود ماواحد أجه مثل الرضا وينه

حتى الذي دين انطلب يوفيله كل دينه

وللمعوز او عنده عسر ميقصر ايعينه

اطلبها اطلبها -- امن الرضا اطلبها

الغيره لتشكيله -- وشعندك احچيله

--

ياهو عزيز امفارگه لو مبتعد عنه

للرضا ايروح ايعفره الشباچه بالحنه

ومن عنده يطلب هالطلب مايعتذر منه

ايفرحه ابو محمد أبد ميخيبه الظنه

والغالي والغالي -- يرجعلك الغالي

وبوسات تهديله -- وشعندك احجيله

--

سيد عدنان الحمامي