شحّ الماي يبنـي بينـك اوبينـي
_________________
شح الماي اجيب الماي گلي امنين
يبني مابگه غيـر الدمـع بالعيـن
ريت البين يعبد الله خذاني البيـن
بيدي اتمـوت هالدنيـه تراوينـي
_________________
تراويني الدنيه اتنـازع ابهالحـال
يازهـرة حياتـي ونبعـة الامـال
جمر اضماك يحرگ يبني بالـدلال
يچويني احس اضمـاك يچوينـي
_________________
يچويني واعايـن حالـك ابرهبـه
وعينك بس عله امك يالولد تربـه
راح اعصر اعيوني المايهن شربه
واخذ شريان گلبي اللـي يغذينـي
_________________
يغذيني القهر يبني واينن الـروح
واهزمهدك ييمـه بالالـم والنـوح
موهينه يعبد الله امن اديه اتـروح
بسواد الحـزن يوليـدي تخلينـي
_________________
تخليني ابحزني وحسرتي ا وروعي
ويظلن كل وكت دم تهمل ادموعـي
تسع تشهر مهد صارتلك اضلوعي
ييمـه ومـن اناغيلـك تسلينـي
_________________
تسليني چنت سلـوه يبعـد امـك
يعبدالله وچنت كل ساعـه اشتمـك
ليل انهـار اناطـر گاعـده يمـك
اعاين وجهـك الهمـي ينّسينـي
_________________
تنسيني اهمومي من اعايـن ليـك
عيني افراش الك وجفونها اتغطيك
لو من الهوه يوليدي اخاف اعليك
والياذيـك احـس يايمـه ياذينـي
_________________
شلون اليوم عنـي تبتعـد عنـي
وليش ام المنايـه اخذتـك منـي
يعبـدالله ييمـه ينگطـع ظـنـي
وايامي بعـد مـدري اشتراوينـي