للاربعين
يالسجاد صاحت زينب ابحسره
وين ادفنت ابوك اوين چا گبره
_________________
يالسجاد عمه امن اليسر جينـه
وانته تشوف عينك هالحزن بينه
وين اگبور اهلنه ويـن دلينـه
اريدن گبر اخويه ارويحة الزهره
_________________
ماشوفن يعمـه ياعلـي ابعينـي
يعمه ابگبر ابوك احسين دلينـي
اريد اگعد وانوح ابكتره خلينـي
اخويه وعلى افراگه بالگلب جمره
_________________
فارگتـه يعمـه اربعيـن انـهـار
اظلم من عگب عينه عليه الـدار
بأخته مادره اعليها اشجره والصار
مچتوفه مشـت للشـام متيسـره
_________________
واليـوم ارجعـت ويـاك بظعـونـي
يعمه اتهل جمـر دمعاتهـا اعيونـي
على ابن امي البواچي جرّحت اجفوني
اخت اعله الاخو خاطرهـا شيجبـره
_________________
شيجبره اعله اخويه الغسله دمه
ثلـث تيـام لاأم اواخـت يمـه
دفنته ابليه راس اشلون ياعمـه
وكل ضلوع صدره چانت امكسره
_________________
امكسره اضلوع صدره وراس ماعنده
گدرت اشلون عمه اتنزلـه ابلحـده
وعبد الله دفنته اويـاه لـو وحـده
صدگ حاچاك ابوك حسين من نحره
_________________
يالسجاد عمه العلگمـي وينـه
عفته اهناك اخويه اوطافيه عينه
وراسه متهشم ومگطعه چفينـه
وظل جوده يعمه ورايته ابكتـره
_________________
دلينـي يعمـه ابگبـره دلينـي
احس من الهظم چنها طفت عيني
اعاتب عمـك العبـاس خلينـي
الحال اخته اشعجب مايگعد اينظره
_________________
خل يگعد ابـو فاضـل يناشدنـي
رحت عنه لوين وشنهو اللي ردني
وعدك وين اگله البيه امواعدنـي
يعباس اعله خدي ماتـت العبـره