[عمار جبار خضير]

كل ارواحنه فدوه لأيمتنه
----------
كل ارواحنه للعتره ننطيها = مو دعوة لسان وقلقلت بيها
شيعتهم نظل ما همنه تاليها = لو كل البشر بالكون عادتنه
كل ارواحنه فدوه لأيمتنه
----------
عشـﮕناهم عشـﮓ ما ينوصف حاله = وبحبهم رضينه الموت وآجاله
سلام الله على الهادي النبي وآله = مصابيح الهدى وبيهم عقيدتنه
كل ارواحنه فدوه لأيمتنه
----------
الحياة بلا قيم من غير منهجهم = للحق للعدل مرفوعه دعوتهم
بس هم الشفاعه اطلبها من عدهم = باب المرحمه واصحاب نعمتنه
كل ارواحنه فدوه لأيمتنه
----------
كنوز المعرفه وبحر العلم والجود = حبل المغفره و من العرش ممدود
لولاهم ابد ما ﭼان النه وّجود = ولا شفنه الحياة وهيه شافتنه
كل ارواحنه فدوه لأيمتنه
----------
دعوة كل نبي آل النبي المختار = مثل وجهه الشمس منهم تشع انوار
تراتيل العشــﮔﮯ بوصافهم تحتار =بفنون الشعر صاروا قصيدتنه
كل ارواحنه فدوه لأيمتنه
----------
آنه من الازل واليت آل البيت =عفت كل البشر بس الهم تعنيت
ما ينفع عمل لو صمت لو صليت = اذا ما تعتقد بالعتره سادتنه
كل ارواحنه فدوه لأيمتنه
----------
من تــﭼبل علي يا صاحبي الصعبات = اصيحن يا علي يا كاشف الشدّات
ميخيب الذي ينخه ابو الحملات = وحب المرتضى اصبح هويتنه
كل ارواحنه فدوه لأيمتنه
----------
كل ارواحنه ننطيها للعتره = والغايه الـﭼبيره بساعة العسره
تحضرنه الزﭼيه فاطمه الزهره = بنت المصطفى وهيه شفيعتنه
كل ارواحنه فدوه لأيمتنه
----------
ولو ردنه الدليل القاطع البرهان = عابس هاك اخذ بالطف صبح عنوان
نزع حتى الدرع وتلاﮔه بالفر سان = واحنه ان شا الله بعابس طريقتنه
كل ارواحنه فدوه لأيمتنه
----------
شعر – عمار جبار خضير
2010