[ماهرالصندوق]

جيتك يا زهره اشتكي ذلي وهواني
واحجيلك شلون التوى دهري وزماني
بعد الخدر يُمّه إجا النذل وسباني
وآنه كريمة حيدره وأخت الحسن وحسين
ـــــــــــــــــ
جيتك يا يُمّه اشتكي من جور أميّه
وأخبرك سوط الشمر اشسوّى بيّه
شلون دْخَلَتْ مجلس يزيد الهاشمية
ثكلى وحيدة ميسره مكسورة الجنحين
ــــــــــــــــ
جيتك يا يمّه اشتكي من خربة الشام
بيها شربت كاس المذلّه وجور الأيام
صارت تعايني الخلق يمّه بلا لثام
وماتت رقيه من الحزن محمرة الجفنين
ـــــــــــــــــ
جيتك يا يُمّه خبرك حال العليل
طوق الحديد بركبته ودمه يسيل
مرة عيونا تلحك الرمح الطويل
ومرة عيونا عالحرم والدمع بالعينين
ـــــــــــــــــ
ماهر صالح الصندوق