[ماهرالصندوق]

كل عام وأنتم بخير بمناسبة مولد سيدة النساء
اقدم لكم هذه القصيدة باللهجة العامية الشامية أرجو أن لا تجدوا صعوبة بقراءتها
ضووا العتم خلّوا الليل نهار
خلّوا القمر ينزل لأرض الدار
نادوا النجم يسهر خلّوا الشمس تغار
ما اليوم مولد فاطمة بنت النبي المختار
*****
بمتل هادا اليوم كان النبي فرحان
وبشر خديجة الطاهرة بهدية الرحمن
قلا الهنا يا طاهرة جايي
وهي الوحي نازل معو آيي
لتزين القرآن
فرح النبي وكبّر
وبالسورة شو استبشر
وصلى لربو حمد واتشكر
ماعاد همّو بعدها إن نادوه يا أبتر
ونادت خديجة بس ما عندي حدا
والصوت دوّى والصدى
واتنهدت حسرة
وفجأة لقت حولا الحور ألوف
وصارت ملايكة السما تنزل لعندا صفوف
آسيا وحّوا معُن والسيدة العدرا
كلّن إجوا يتباركوا بولادة الزهرا
*****
وحمل النبي بنتو بفرح
واتطلع بوِِشّا وسرح
ومتل الجمر نزل الدمع
من لمحت عيونو الضلع
وضمّا لصدرو بكل حنان وقال
حملك يا بنتي ما بتحملو جبال
وهادا وعد مكتوب من الله
وحجه على أهل الدني كِلا
يلا كبري يا فرحتي مع هالحزن يلا
*****
وكبرت البنت البتول
قدّام عينين الرسول
وصارت صبية مزينة
وصاروا يجوا الخطاب
ويدقدقوا عالباب
ظنوا القضية هيّنه
ومن بين كل الناس
ضوّى متل نبراس
وشعشع علي متل الشمس
واتحدد بلحظه العرس
وصارت ملايكة السما تهني الرسول
وتقدم البشرى
ومعهن نزل جبريل حتى يقول
لو ما علي مخلوق
ما كان في مخلوق بيستاهل الزهرا
*****
وتجمعوا النورين بالإيمان
وخلّو الشتي أحلى من النيسان
وزرعوا سوا بذرة شجر
ليعم خيرا عالبشر
وصار الزمان يدور
وهالغصن شعلة نور
وزهّر قمر، وحد القمر زهّر قمر بعدين
سمّوا الأول حسن وسمّوا التاني حسين
ولمّا اكتمل عقد الدرر
واتجمعوا هنّي الخمس
الله بعت وحيو بخبر
طهرتهم من كل رجس
هادا النبي طه الرسول
مع بضعتو الزهرا البتول
ومعهن حسن وحسين والحيدر علي
عا قد ما بيتواضعوا ذكرن عِلي
وأني خلقتن نور ما متلُن حدا
ومهما عمل كل البشر
من غير حبّن كل أعمالن سدى
*****
واليوم جينا بهالمسا
نهنّي النبي ببضعتو
ونزيل عن قلبو الأسى
ونمسح بكلمه دمعتو
قالو الأسى ما بينتسى
وكتير مرة طعمتو
قلتلهن عنا الحزن طول السنه موجود
آهات خنجر بالصدر ودموع فوق خدود
بهاليوم ما بدنا حزن خلو الحزن بكرا
بنرجع لنذكر كربلا ومصيبة الزهرا

ماهر صالح الصندوق