هد مني يوكتي واشـــبعد هديــــت كظيت وياك عمري بس حزن وهموم
شبعد عندك تهد بيه العمر خلصان وشيبت الكلب من جم جرح ملجوم
خذت مني ليالي طــــوال ما ترجع وجبتلي ايام بيها من الفكر مالوم
بزغر سني يوكتي وعلمتنـي دروس شنهو ونين شنهو الاه شنهو اللوم
تعبنـــي الالم وبكلبي بـــــي مليــان يا اه اليعدهـــــا وجنة عـــــــد نجوم
خلص عمر الطفولة وخلصت الدمعات واجة وكت الشباب العين بيه اتحوم
يامدمع اسجبة وعين بيه اتلوج وصدر اهات من ونه يون مهضوم
واروف جروحي بجروحي الملتلي الروح بخيوط الونين ومن كلب مهدوم
************************************************** ****************
صبغت الشيب واني بالعمر عشرين اشبعد اصبغ اذا بيه صعد لسنين
خطية ياعمر مو بعدك زغيرون وجبير عليك ثوب الهم يمسكين
جبت عمرك ركض واسابج انت الريح وهسة بالمشي ياوسفة هالرجلين
خانت ما وفت وياك كام اتميل لان بيها الوكت حمل ليالي البين
وفي وياك الحزن مافاركك فد يوم وخلة بكل كتر منك نياشين
تحزملك وكفلك من طحت عالكاع يعني صاحبك وانت بعمر يومين
لفك من هموم كماطة بالحسرات وزرع بيك المدامع جالبحر بالعين
وعلى جبينك وضع نيشان لاينساك رسم وجهك علامة وانت صاحب زين
يصاحب صاحبك والصاحبك وداك لان يدري بصحبتك ما تصير اثنين
بس اصبر واكابر دوم ابقى وياك لان وياي دوم التجوة ابو الحسنين
شحدك ياوكت ! ..... بقلم الشاعر احمد رفيش
