[خادم الجوادين]

الى حارث الشر
*********

خل نحجي بصراحه ونكشف المستور ونبين الحقيقه ونفضح الباطل
والمايشتهينه يشيل والله وياه شلنه بعشرة الغلطان ويزاغل
غايتنه الوطن بارواحنه نعليه وغايتهم يظل متاخر وفاشل
حاولنه نتناسه جروح عصر الموت.. ولهسه بوجعنه نلوج ونحاول
سكتنه ع الجريمه وماطلبنه وسجلنه المقابر من فعل فاعل
وغضينه النظر عن زمرة الاجرام.. حبا بالعراق الواحد الكامل
بس طبع العوج ماينعدل فد يوم ومجنون الحكم ماينقلب عاقل
يتحجج علينه يريد حزبه يعود وبعين الصلافه يكوم ويجادل
بعثي وليس ثوب الدين للتمويه .. عباله الشعب مايعرف وجاهل
حلل دم اهلنه وجوز الارهاب .. متشبع حقاره وطائفي وسافل
كافي من السكوت شبينه مرعوبين.. واحنه الخلصينه اعمارنه ناضل
وصلت للذبح والروس تلحك روس والدم بالشوارع صاعد ونازل
وخضره قبورنا ومامرعليها سبوع ومهدل الضاري ويبجي ع القاتل
جنه ع المنايا نادي بسم حسين وجنه بكل شجاعه نجل العايل
وجنه من تتناخه نهز الف طاغوت ومجادح تفاكنه يعدل المايل
جا هسه شجانه نام تحت السيف لاحس لانفس لا ايد التماطل
يذبحنه ونروح لبيته نعزيه..جن هو الضحيه واحنه القاتل
اسمع ياشعب واذكر كلامي وياك.. ماتصف القضيه وانت متفائل
ولاينهض وطنه ولايشوف الخير اذا نخفي الحقيقه ونكعد نجامل

الشاعر عمار الوائلي