[عمار جبار خضير]

لا تــﮕول آنه حسيني وانته تغتاب البشر =ولاتــﮕول آنه موالي والحقد بيك انتشر
----------=
اصحى من عالم خيالك وانتبه من السبات =
كافي من هذا التفاخر والتشدق بالصفات =
بلحظه ما تدري ودقيقه وعنك يكولون مات =
ما تفيدك كل صفاتك لو نزلت انته الكبر =
----------=
امشي بدروب التسامح والتواضع والوفاء =
واليضدك لا تضده خله وي ربه الجزاء =
صير مثل النخله دومك تنتج اثمار وعطاء=
الناس ترميها بحجاره وهي بالطيب تدّر =
----------=
هاي ايامك كصيره والفرص تغدي وتروح =
اغتنمها اليوم تفلح كبل لاموتك يلوح =
انته ميت بالنهايه ولو عشت ماعاش نوح =
والاجل لو حان وكته ما يفيدك كل عذر =
----------=
الحسينيه عقيده تريد من عدنه الفعال =
ما نجامل ما نخادع نحجي شكلين بمقال =
كون نثبت عالطريقه يمنه ما نمشي وشمال =
نمشي بس صوب الحسين وبس اله انضحي العمر =
----------=
من تزور احسين اوكف وانته تهديله السلام =
فكر بعين البصيره وافتهم معنى الكلام =
وكول ليش احسين ضحه ويه اصحابه الكرام =
حسين لاجلي حسين لاجلك انطه للباري النحر =
----------=
يل تكول انه حسيني وانه خادم للبتول =
ابشر بهاي الخدامه لكن بشرط القبول =
اخلص النيه بخدمتك وطبق لنهج الرسول =
والي ترضه الزهره عنه ينشمل باعظم اجر =
----------=
يا نفس وانه ارد اسألج انتي يل كلج شرور=
التبجح ما هو ثوبي وليش كل هذا الغرور =
وانتي لوما حسين قدرج ضايع ابين السطور=
حسين علمني القوافي وانظمت باسمه الشعر =
----------=
عمار جبار خضير
2010

[جارية العترة]

اقتباس هاي ايامك كصيره والفرص تغدي وتروح = اغتنمها اليوم تفلح كبل لاموتك يلوح = انته ميت بالنهايه ولو عشت ماعاش نوح = والاجل لو حان وكته ما يفيدك كل عذر =

ياحبذا لو يعتبر الانسان ..فلايام معدودة وكم كم رحل لنا من الاحباب لاسيما اؤلئك الذين مضوا في ريعان الشباب ...
إن شاء الله نكون على النهج الحسيني حقا وماتحمله ثورة الامام صلوات اله عليه من قيم واهداف
دمت شاعرا ولائيا اخي ابو محمد

[عمار جبار خضير]

اقتباس المشاركة الأصلية كتبت بواسطة جارية العترة ياحبذا لو يعتبر الانسان ..فلايام معدودة وكم كم رحل لنا من الاحباب لاسيما اؤلئك الذين مضوا في ريعان الشباب ... إن شاء الله نكون على النهج الحسيني حقا وماتحمله ثورة الامام صلوات اله عليه من قيم واهداف دمت شاعرا ولائيا اخي ابو محمد

شكرا وبارك الله فيكم لكم مني ارق التحايا الاخوية