أحمد...القرآن بيته...ودمعته بصحن الحسيــــــــــــن
وجان من يبجي اعلة زينب...ينكلب كل وجه عين
يواسي سكنة ويندبلها...عمج العباس وين
وحتى من استشهد احمد...جثة بس ابلاية ادين
........
وأسعــــد... فراشة القصيدة..وصحوته اطيوف الشعر
ومفرداته..بحضنة تسهر..وبيهن ايخيط السطر
عندة بالغرفة منصة...ومن أسأله يكلي سر
يمة بت بيت المنصة..والقصيدة الها ستر
ويوم من استشهد اسعد...صار بيت من الشعر
(عجز راسة من القذيفة...وجثة الباقي صدر)
........
وجاسم..أزماطي وظنوتي..وهيبتي وذخر العشيرة
سييف من يوكف يسولف...تنضح من اعيونة غيرة
ومن تنام اعيونة تغفة..وصاحي مانايم ضميرة
جفة جان احجاب جاسم...ماكشف ستر الظفيرة
كابل الموت بكرامة..وظهرة مايعرف يديرة
مات بس عيونة ظلن..؟لكوا بين اعيونة ديرة
.......
وجان اخر ولدي خالد...عاشك ويختلف عشكة
شايل بصدرة الخريطة.. وحاط فوك اجتافة تفكة
يكلي حك يمة العراق..ومنهو يمة ايعوف حكة
من العلم خيط قميصة..يكلي اموت وهو يبكة
ومن اجانــــــــي بلاية راس..راسة مايقبل يدنكة
(( اربعة لكنهم العراق ))
