[عدنان الحمامي]

بسمه تعالى

سلام عليكم

--

--

المستهل

-- تودعني -- تودعني -- آنه أمك تودعني

حسين اتوادع أويه أمه -- يسمع فاطمه اتكلمه

--

حسين ودمعه يتهامل -- للزهره يودعها

يسمع من لحدها الصوت -- تبچي ابحرگه يسمعها

هذا اوداع وين اتريد -- لمّك ليش تفجعها

مو تدري الصدر مجروح -- والبسمار روعها

وين اتريد -- وين اتريد -- يبني حسين -- وين اتريد

ضلعي يبني لتلچمه -- يسمع فاطمه اتكلمه

--

گاللها ابحزن گلبه -- ويتلاهب دليله ابنار

يمُه عنچ أمسافر -- هليله اصبحت خطار

وباچر احدي بضعوني -- ولا واحد يظل بالدار

عندي بس عليله اتظل -- ماتحمل سفر وأخطار

تبچيّني -- تبچيّني -- انظرها تبچيني

كثرت للگلب همّه -- يسمع فاطمه اتكلمه

--

سمع من اللحد فد صوت -- صوت أختنگ بالعبره

ونتها ابضلع مكسور -- بألمها أتكلمه الزهره

يحسين المسير اطويل -- يبني ورحلتك خطره

وعني لو خذت ولياك -- گبر أمك منو ايحضره

لاترحل -- لاترحل -- يبني حسين لاترحل

گبري من يجي يمه -- يسمع فاطمه أتكلمه

--

جاوبها ييمُه الدين -- حرفوا كل معانيه

وعالذل مابعد أصبر -- ولا أرضه بعبوديه

أبدمي ارد اضحيله -- ولآخر نفس بيّه

حتى لو عدوي ايجور -- تذبحني مواضيه

أجاهدله -- اجاهدله -- ديني كون أجاهدله

وتراب الگبر شمه -- يسمع فاطمه أتكلمه

--

ظل ايسولف او تسمع -- ويسمع من گبرها أونين

گالتله يرحانه -- المحمد يبني ورياحين

ولمّك يبني چنت الروح -- ومهجتها وضواها العين

وحدك عالسفر ناوي -- لو كل الاهل ماشين

شبانك -- شبانك -- تظعن كلها شبانك

مو جرحي نزف دمه -- يسمع فاطمه أتكلمه

--

-- يمه فاطمه الشبان -- واخوتي كلهم الطيبين

بحزام الوفه وياي -- يمُه بغيره متحزمين

عباس وثلاثه ابطال -- ابسوح الموت معروفين

وحتى اليرتضع بعده -- ايجاهد رايد الهل الدين

رايدهم -- رايدهم -- يمّه المجد رايدهم

قربان الدمه انقدمه -- يسمع فاطمه أتكلمه

--

نشدت يبني أختك وين -- زينب خل أكلمها

اودعها او تودعني -- عزيزة فاطمه أمها

لختك من يباريها -- ابها المسره او يلازمها

ماريد الدهر يحسين -- منك يبني يحرمها

ترعاها -- ترعاها -- لختك يبني ترعاها

وعمرك ربي اليسلمه -- يسمع فاطمه اتكلمه

--

سيد عدنان الحمامي

































--

[جارية العترة]

اللهُمَّ الْعَنْ أوّلَ ظالِم ظَلَمَ حَقَّ مُحَمَّد وَآلِ مُحَمَّد ، وَآخِرَ تَابِع لَهُ عَلَى ذلِكَ ، اللهُمَّ الْعَنِ العِصابَةَ الَّتِي جاهَدَتِ الْحُسَيْنَ عَلَيْهِ السَّلام وَشايَعَتْ وَبايَعَتْ وَتابَعَتْ عَلَى قَتْلِهِ. اللهُمَّ الْعَنْهم جَميعاً

اقتباس نشدت يبني أختك وين -- زينب خل أكلمها اودعها او تودعني -- عزيزة فاطمه أمها لختك من يباريها -- ابها المسره او يلازمها ماريد الدهر يحسين -- منك يبني يحرمها ترعاها -- ترعاها -- لختك يبني ترعاها وعمرك ربي اليسلمه -- يسمع فاطمه اتكلمه

ماذا يقول المرء الا لعن الله ظالمي ال بيت محمد واله صلوات الله عليهم

مثابين وعظم الله اجوركم شاعرنا