[علاء السعيدي]

قصيدة ابو محمد المياحي في وصف الامام علي من قبل ابو ذر
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــ
يابو ذر جاوبني الغريب إلما عرفته منين يابو ذر


انت البصدگ معروف والهادي شهد لك من على المنبر


عُمر منك نشد عنه وگلت ماعرف شخصه وگمت تتعذّر


جاوبني أحلفك بالنبي وحبه عليك تبين الجوهر


غريب الوصف هذا منين ويـــا سر البشخصه إنسر


أنشدگ عن وليد انولد بالكعبه وانشدگ عن جدار البيت ليش انطر


جاوب عاشگ ومجنون وعقل شاعر زغير ولو حچه قصّر


وعيون الشماته تحيطني نيران مثل نار الخليل على المحب تسعر


أنه إبختك فريسه وطحت بين ذياب وكم ناب العليه من الحقد كشّر


دليل تريد مني الناس وخايف من ازل إبزلتي أتعيّر


عليك بغربتك وبموتة الوحدة تجاوب عني يابو ذر


گال احجي بصراحه وصيح زلمه البصدگ يجهر


گلت افصح بعد اكثر


گال اليرضه بالذله ذليل يعيش بالدنيا وعليه حتى الطفل يجسر


گلت واليوفي حد الموت واليصدگ بحبه ويرخص المنحر


گال اسمع تره السر النشدت عليه أنه جاهل بشخصه ومثلك محير


گلت عن ظاهره احجيلي ومناقب عِدله لو تگدر


گال اسمع مناقب ماتعدهه اقلام لو صار الزمن دفتر


گبل لاينولد بالبيت على ساق العرش نوّر


وآدم من عصه ربه ذكر اسم الوصي وباسم الوصي استغفر


تريد اكثر ازيدگ والحجي مسنود والف ملعون من انكر


الف ملعون من زل الطريق وتاه وتعثر


الف ملعون من يقرا الحديث وحرّف وغيّر


تريد منين تبدي وياه من ياجانب اتخير


گلت من مولده ابديلي گال البيت لاجله انطر


گتله بايمانه دحچيلي گال بيمنته الاصنام تتكسر


ابد ماسجد للاصنام ولا بالجاهليه اعتقد وتأثر


گلت عن العلم سولف گال اگصد عمر ياباب يوصل ليه لو مخه وگف وبمعضله حجر


گتله دخيلك أعذرني وعلي استر


اذا اذكر عمر لاسامح الله بسوء بعض الناس تتكتر


اعگبه وخل نسولف بالشجاعه شلون بالحملات ابن عم النبي لو كر


گال اتصفح التاريخ واقره بكل روايه وشوف كل مصدر


ماتلگه خبر مكتوب عنه يگول يوم بمعركه أدبر


انشد من بدر عن زود ابو الحملات وشوف شلون بالابطال يتخير


وانشد عنه بالاحزاب وبيا سيف جيش الباطل تطشر


عبادات الخلگ كلهه يعادلهه بطبرته المرتضى حيدر


ابن ود يشهد بزوده ويشهد مرحب ويشهد حصن خيبر


علي بكل الشدد يحضر -------- علي مايوم يتعذر


علي ينطرد باسمه الشر --------- علي الساقي على الكوثر


علي الطاعن --------- علي الطارد --------- علي نجم السمه ثاقب


علي هيبه محاچينه --------- علي گمرة ليالينه


علي للموت والينه --------- علي ياحكمه التنزيل


علي يامعمل التأويل--------- علي يلعلمت جبريل


علي العاداك يتأخر --------- علي المابايعك يخسر


وزير المصطفى المختار گبل الدنيه يلسامع علي بسابع سمه توزر





منقول
ونسألكم الدعاء

[بنت الهدى2]

[type=853775]گال اسمع مناقب ماتعدهه اقلام لو صار الزمن دفتر

من مثلك ياامير المؤمنين
روحي لك الفداء ياامير المؤمنين وقائد الغر المحجلين
اللهم بارك ووفق كل مم يخدم محمد وال محمد [/type]