يا ضوه العين ... غيبتك طالت عليه
يبني يحسين ... روحي تتمنه المنيه
دمعي يجري ... حرت بأمري
***************************************
سافرت والروح عاشت ... بالوداع أصعب مسيه
بأربع أولادي فديتك ... عهدي للزهره الزجيـــــه
مرت إبالي صورك ... يا أعز من روحي اليــــه
جنت يبني اشما اشوفك ... جن شفت حامي الحميه
والسفر وين ... وين يا سبــــــــاح كَلبي
دربك إمنين ... أمشي وأتعثر بدربــــي
نفذ صبري ... حرت بأمري
***************************************
شرف لو كَتلك اوليدي ... والله يشهد روحي بيتك
لو غبت من بالي لحظه ... هذا مو يعني نسيتــــك
مره ما شفتك بعيني ... كَاعد بكَلبـــــــــــــي لكَيتك
الهالسبب بالغالي عندي ... يا أبو الأكبر فديتــــــك
رفعة الراس ... يا ضوه اعيوني ييمه
وإبني عباس ... راخص لممشاك دمه
هذا ذخري ... حرت بأمري
***************************************
سافر إكَبالي ضعنكم ... شاغت الروح بحزنهـــــــه
إنته وأحبابي شفتكم ... روحي أحس إنكَطع ظنهــــه
وبألم يحسين صاحت ... وأستمع نبرة شجنهــــــــــه
إوياك أريد اليوم أروحن ... وهذا كَلب أم إعله إبنهه
نار الأشواك َ ... كَمت أحس روحي غريبه
ولمن أشتاك َ ... ترسم دموعي المصيبـــــه
وشنهو عذري ... حرت بأمري
***************************************
بكربله وما أدري يبني ... هم شفت يحسين غربه
هم شفت لوعات مثلي ... حيرة الما يدري دربـــه
مره أكَولن هسه ترجع ... مره لا تاخذني رهبــــه
يرجف إكَليبي وأنادي ... وأدعي للباري وأطلبـــه
يا آلهي ... رجع حسين وبنينــــه
يا آلهي ... بجاه عبراتي الحزينه
الله يدري ... حرت بأمري
***************************************
ليلي بالحسبات يكَظي ... والنهار أظلم أشوفـــــه
شلون وانته ابعيد عني ... كَلبي هم إعذر ظروفه
ما وصل مرسال منك ... والجرح ياهو اليروفــه
والحزن يسري بكياني ... وشخصك بطيفي أطوفه
هذا حالي ... يالمشيت وودعتني
والجرالي ... بالمدينه من عفتني
إخذ عمري ... حرت بأمري
******************************************
الأبيات للشاعر الموالي عمار هليل الواسطي
نسألكم الدعاء لنا ولوالدينا
في رثاء أم البنين عليها السلام ..
