[عدنان الحمامي]

بسمه تعالى
اللهم صلي على محمد وال محمد
--------------------
وفاة الامام علي ع
--------
المستهل
---------
يحسين ابونه اشبيه -- آه ياخويه
هالجرح أثر بيه -- آه ياخويه
دم هامته مسفوح -- من ايدي بس ليروح
-------------------
زينب بدمعة حزنها تبچي وتعاين لبوها
بدمه شيباته الشريفه ياوسافه ايخضبوها
هيه بالزهره يتيمه وبأبوها أ يتموها
والحسن وحسين اخوها بهل المصيبه ايصبروها
صاحت ينور العين -- آه ياخويه
واسيني خويه حسين -- آه ياخويه
والجرحي زاد اجروح – من ايدي بس ليروح
----------------------- 2
صاحت بصوت المصيبه زينب وعالخد دمعها
بويه يابويه يحيدر چبدتي امصابك گطعها
رادته ايعاين عليها لو بچت بلچن سمعها
وحيدر بسيف المنيه حالته اتغير وضعها
حيدر ابونه انصاب -- آه ياخويه
شيبته ابدمه اخضاب -- آه ياخويه
ابقه بحزن وبنوح -- من ايدي بس ليروح
----------------3
داحي خيبر هذا ابويه وبالصبر آنه اعرفه
شلون چتال ابن ود بهامته ينطبر وسفه
جرح راسه ما اظنه بعد من هالطبره يشفه
ولاجمر حزني اعله بويه يبرد ولا بعد يطفه
من بعده صرنه اياتام -- آ÷ ياخويه
ياجفن ليله اينام -- آه ياخويه
أمسير سفينة نوح -- من ايدي بس ليروح
------------------4
گبل فاطمة الزجيه وبيها يحسين انهظمنه
بعضرة الباب وضلعها ماتت امن القهر امنه
اليوم لو راح الصميده اخلافه ياچف اليلمنه
ياهو يحسين ابغيابه يجلي من الحزن همنه
بعمري ابويه اشريه -- آه ياخويه
لو راح وين الگيه -- آه ياخويه
افديها لجله الروح -- من ايدي بس ليروح
--------------------------5
خويه من شافه طبيبه شگال متسولفلي عنه
صدگ مايشفه يخبرك صدگ أيس خويه منه
عمت عيني شلون ابويه اسمعت من الطبره ونه
هنّه يحسين المصايب لفن من اردود هنّه
مصيبة ضلع مكسور – آه ياخويه
وطبرة ابويه الدور -- آه ياخويه
ظل الحمل مطروح -- من ايدي بس ليروح
-----------------------6
بويه يابويه اريدك خل اودعك خل اشمك
گبلك اتمنيت ميته ولا اشوف بعيني دمك
لو يصح ماروح اظلن يالابو متوسده يمك
وأندفن وياك بويه لحدك ايظمني ويظمك
يحسين اخذني اوياه -- آه ياخويه
مگدر أنه ابلياه -- آه ياخويه
بجفني دمع مسفوح -- من ايدي بس ليروح
--------------
سيد عدنان الحمامي

[جارية العترة]

عظم الله اجركم باستشهاد سيد الاوصياء صلوات الله عليه ولعن الله قاتله ابن ملجم المرادي
لاتنسونا من دعواتكم

[جعفر باقر]

أحسنتم أخي الكريم
لعن الله قتلة أمير المؤمنين