[منتظرة المهدي]

يهلال الكدر هليت وابعيني اظلمت دنياي
من أخوتي أبد ما خليت بيك كل ولياي


اشعندك عودت يا هلال يا شهر الكدر والشوم
يريتك لابده اهلالك ونورك حجبته لغيـــــــوم
فقدنه بيك أحبتنه وبيك اتحير المظلـــــــــــوم
ووقف ويحشم الأنصار
وقف ما بينهم محتار يقلهم والدمع نثــــــــــار
مالي امعين ولا نا صر بقيت وحيد بين اعداي



بيك اتصور جاسم يوم الرجع بيه عمــــــــــه
اعلى صدره شايله وينحب إيديه اتحنت ابدمه
مدد بيده العريس وطلعت صارخة أمــــــــه
يبني اتصيح منفجعه
اعلقت يالولد شمعه يا جاسم ابها الطلعـــــه
خسرتك يا بعد عيني ييمه وين راح اربـــاي



وما أنسه علي الأكبر رد ابنعشه وامبرقـــــــــع
نشدت حسين وين ابنك قلي جبته امقطـــــــــــع
صحت ابصوت واويلي اشيفيد الصوت والمدمع
شبيه المصطفى من راح
بينه مابقت أرواح ليله اتصيح يا مصبـــــــــاح
انطفيت اوباد كل حيلي وما أقدر أشــيل أرداي



يالبيك افقد ت عباس يوم الرد اخوي حسيـــــــن
على اعضيده انكسر ظهره وينشف ادموع العين
قلت وين أبو فاضل قلي راحت الكفيـــــــــــــن
لقيته مقطع اكفوفه
يختي وانفقد شوفه الهامه ابعم مخســــــــوفـــه
بين إيدي إسلمت روحه ظامي مات يم المــــاي



مصيبة وأبد منساها مصاب حسين بوليـــــــــده
يوم اللي أخذاه للقوم ظامي شايله ابئيـــــــــــده
الباغي حرمله ابسهمه رماه او قطع اوريــــــده
من جات السهم فرفر
اتروه من دمه المنحر اجه احسين ابكفن محمــر
الرباب اتصيح راح ابني وراحت دنيتي وسلواي



يهلال الكدر واعظم عليه امصاب أبو اليمــــــه
الضبابي اتربع ابصدره يحز ابراسه ويشتمـــــه
قتله ابراحه خله ايموت متشوفه نزف دمــــــــه
دفعني وقال لي وخري
على ابن أمي انكسر ظهري ياريت انفنه عمري
ولا اشوفه ابذيك الحال مذبوح انعمت عينــــاي



ومصيبتنه العصر صارت كل اخيمنه شبت نار
العيله فرت ابهيمه تتراكض اصغار اكبــــــار
هاي اتصيح يا عمه وذيج اتنادي يا ستــــــــار
هاي اتقول سلبوني
وذيج اتصيح ضربوني ياعمه اشيطـــلبونــــي
ساعتها انشده بالي ما ظل لي فكــــــر لا راي